九 斤：我个阿爹起得早，挑付担子往乡下跑。伊日出走到月上梢，同月亮婆婆来碰到。她见我阿爹人品好，送我阿爹扶桑条。阿爹拿回扶桑条，做一梗斧头柄刚刚好。这把斧头是个宝，讲出来让侬吓一跳。拿起斧头斩毛竹，毛竹会得变萝卜。拿起斧头切萝卜，萝卜会得变猪肉。拿起斧头甩一甩，一锅清水会变饭。拿起斧头抖一抖，一碗清水变成酒。拿起斧头亮一亮，亮出盘头十八样。鱼虾蟹酱辣鸡辣鸭辣白鲞，糟鸡糟鸭糟肚肠。黄鳝泥鳅不算帐，田螺螺丝凑两样。萝卜芋艿苋菜梗，外加一碗霉千张。拿起斧头斩木条，木条会得变金条。徽州朝奉来寻宝，铜钿还过六千吊。
石二佬：叫声姑娘九斤囡，侬个口才比我高。我只勿是金丝猫，侬只勿是扶桑条。这件事情平平过，误会一场是玩笑。
九 斤：侬只勿是金丝猫，我梗真是扶桑条。勿是误会勿玩笑，勿信侬去问那月婆佬。这把斧头世上少，铜钿六千吊勿卖掉。赔侬一只金丝猫，铜钿除掉三千吊。还有三千赔过来，万事全休倒罢了。如若铜钿赔勿出，我问侬公了了还是私了了。
石二佬：倒灶倒灶真倒灶，我猢狲骷髅自己套。本想难难九斤囡，结果把自家来上当。公了了么奈格了，私了了么奈格了。
九 斤：公了了么勿得了，我拉侬到众家祠堂去走一遭。前邻后舍都叫到，再请出家长太公张福高。先叫侬众人面前来跪倒，再告侬蛮不讲理把竹杠敲。为了侬个石宝宝，扣我阿爹把事找。侬几次三番来刁难，无法无天无礼教。说得大家心里火，赶走侬个石二佬。私了了么侬听牢，悔过书一张快写好。侬从今勿准把竹杠敲，老老实实是勿要刁。放我阿爹回家转，这件事情算了掉。
合 唱：江南有座绍兴城，城里有个小九斤。一斤半两斤半，二十四两三斤半，伊美丽大方又聪明。